مجرد هرطقة

الي يقرأ البوست ديه ويجي يقرأ ديه يقول أكيد الي بيكتب ده مختل عقليا أو عنده شيزو فرينيا 

مع إن كل فرضياتك صح بس أنا ببصلها من ناحية تانية 

ببصلها إن الواحد عشان يبقى بيستخدم عقله استخدام سليم لازم يعيد النظر في المسلمات الي بيبني عليها استنتاجاته وبيقرب من فهم

الحاجات ماشية ازاي حواليه

أستغربت جدا لما كنت بتناقش مع أحد أصدقائي المقربين في النقطة ديه ولقيته بيأكدلي إن فيه بعض المسلمات مينفعش نشكك فيها أو
 حتى نفكر هي جت منين
لو فكرت شوية حتلاقي إن كلامه صح من ناحية

إن فيه بعض المسلمات التفكير فيها مش حايوصلك لحاجة .. أو على الأقل بالنظر لتجارب الاخرين الي سبقوك وكانوا أذكى وأعلم وأكثر وعي منك وموصلوش لحاجة..
بس لما تيجي تبص للموضوع بدقة أكتر .. تلاقي إنه بيناقض نفسه بطريقة بشعة
لأن نفس النقطة ديه بيشتكي منها المسلم من المسيحي .. والمسيحي لليهودي والملحد للمؤمنين والعكس
كله بيتمنى إن الآخر يترك مسلمات العقل .. ويبدأ يفكر في الأمور بتشكيك أكتر عشان يشوف الحاجات من وجهة نظر الآخر

عقيدة الثالوث مثلا عند المسيحين هي واحدة من المسلمات التي لا يستطيع أي مسيحي التشكيك أو التفكير في صحتها .. و التفكير فيها بيعتبر هرطقة وبحث في أمور فيما وراء الطبيعة .. أمور الاهية ميستحملهاش عقلك استيعابها .. وإنك عمرك ما حتفهمها .. ومش مطلوب منك تفهمها المطلوب منك تؤمن بيها وبس
في نفس ذات الوقت .. في أي خطبة جامع أو درس دين عند المسلمين .. بيعتبروا الحتة ديه كذبة كبيرة وهرطقة تستحق السخرية إن دماغ بشرية سمحت لنفسها إنها تؤمن بحاجة زي كده ..

لو بحثت في الصراع بين الآديان حتلاقي أمور زي ديه كتير وكل طرف بينظر للتاني نفس النظرة .. وبيتمنى لو يترك مسلماته أو يشكك فيها ..

بس في الحقيقة إن ده صعب جدا يحصل ..
المسلمات ديه بيتعلمها العقل في سن صغيرة جدا .. بتترسخ في عقله زي واحد + واحد = أتنين ..
وعامل كبير بيأثر هو البرمجة اللغوية العصبية الي بيعملها الواحد في نفسه وبيعملها المجتمع المحيط بيه ..
لما المسلمين يقولو أكتر من مرة في اليوم كل صبح وكل ليل .. "قل هو الله أحد" ... الله واحد ... الله واحد
ويربطها في دماغه بإن الي بيفكر غير كده .. كائن مش بيستخدم عقله ..
أكيد حيكون من الصعب إنه يتقبل فكرة زي ديه .. في المستقبل .. ويعتبر مجرد النقاش فيها مضيعة لوقته ..

ونفس النقطة بالنسبة للطرف الآخر .. عمره ما حيفكر في يوم يشكك فيها ..

من وجهة نظري كلا من الطرفين مخطئ إنه محطش احتمالية إن واحد من مسلماته تكون غلط ..
بس ده يرجعنا للسؤال .. طب ايه أصلاً تعريف كلمة "مُسَلَّمَة"  وامتى تكون غلط ؟ وايه الي يخلينا صح لما نقول على واحدة غلط ؟

من وجهة نظري بدأت أؤمن إنها متفرقش .. وإن العملية كلها نسبية .. وإن المهم إن مسلماتك متكونش بتعدى على حق من حقوق الآخرين .. سواء حريتهم أو حقهم في الحياة نفسها ..